Ek kaam jo hum sab Pakistani, hamari government or hamaray politicians bohat achay se karte hain woh hain “Baatein”. Bohat saari, lambi lambi, idhar udhar ki, ek dosre ki, achi buri baatein!!
Kyunke baatein karna bohat asaan hai. Sirf yehi ek kaam hai jis main na mehnat lagti hai or na paisa lagta hai. Log politicians ki baatein karte hain. Politicians ek dosre ki baatein karte hain. Or jo log bach jatay hain woh apni baatein karte hain. Jisko dekho sirf baatein karne main masrof rehta hai. Pakistan main tabdeeli lanay ki baatein, terrorism ko khatam karna ki baatein, Load shedding khatam karne ki baatein, Corruption ko rokne ki baatein, next election main soch samajh kar vote dene ki baatein, VIP culture ko ban karne ki baatein. Sab ek hi kaam main lage howe hain. Ek kaam jo koi bhe nahi kar raha woh hai “KAAM”. Pakistan ko America jaisa mulk sab banana chahte hain lekin aisa banane k liye kaam koi nahi kar raha. Isi mulk main parh likh kar agar degree mil bhe jati hai toh yeh bol kar k “Pakistan main koi future nahi hai” nikal jatay hain America.
Koi bahar se akar nahi badle ga sab kuch. Hamein hi badalna hoga or badalne k liye kuch kaam karna hoga kyunke khayali pulao banane se toh pait bhe nahi bharta!!
